دارميات
عهدي ويه دمع العين بسمك تجدد
لابن الولاهه البين بضعة محمد
العهد بالدم دوم لحسين اكتبه
ومن يمر بيه الضيج بالشده اندبه
اندب يبو الاحرار فدوه انه لسمك
وبروحي والدلال يا محله رسمك
رسمك يراعي الزود شاخص بالعيون
ممنون الك يحسين وبعمري مديون
مديون الك بالروح يبن الزجيه
وريت النحر مذبوح بالغاضريه
الغاضريه تلوج ونزيد النياح
لن بيهه روس ابطال شالتهه الرماح
بالغاضريه وكون من جدمي للراس
انزف دمه ومخضوب واندب يعباس
عباس الك شمسين تصرخ يوفاي
ساجه النهر بدموع عينه وسكه الماي
الماي الك ممنون يابو الحميه
وكل كطره منه تصيح افدي الزجيه
زينب ييمه عليج من يوجب البين
ردي الوديعه هناك من منحر حسين
هم شفتي يمه شلون من شعلو النار
صرت الهج بطرواج من وحشة الدار
يا دار الج وليان وابعدهم البين
صار القلب هممال من نشفت العين
ريت الجسد تحويه طويات التراب
ولاشوف ابو السجاد دامي على التراب
هم غربه وبلا حيل وبلايه وليان
هنياله من حضروه بالشده خوان
خواني بارض الخيف وننو على الكاع
ومن حشمت عباس جاوبني الوداع
خويه ارد اموت وياك لا تغمض العين
سل سيفه دهري وياي وتحزم البين
ما حسبت يحسين تتركني وتروح
وتخلي بالدلال بس عبره وجروح
مسبيه بين الكوم وتصدلي الناس
صار الشمر حدداي تقبل يعباس..؟
رحيم الحسناوي
|