الى سيدي ومولاي الامام الحسن العسكري ع

[رحيم الحسيني الحسناوي]

على كبتك يالحسن ضل يون دلالي ... وحزن يبت الامامه وشوك يبرالي

يشع نورك وماغاب ... جرح لليوم ماطاب

يضل حبك عشكنه وبيرغك عالي


حقد مدفون عدهم صارله سنين لان باطل دربهم... ومن عجزو وخابو صارت انوب عالمرقد حربهم

وعالشيعي الموالي لزمو دروب ويذبحوه بحقدهم ... شياطين الكفر ذوله اهل الاحقاد مثل ضلهم مكرهم

ومثل ما شمر بالطف ذبح والينه ... يعيد ارهابهم نفس الفعل بينه

شترك يزيد وشجاب ... جرح لليوم ماطاب

يضل حبك عشكنه وبيرغك عالي

يروح حسين انته ونور ماغاب ياروح العقيده ... ابنك يالطهر ردناه بلواه مجد حيدر يعيده

حسين المادنك هامات لعداه وسكه الدين بوريده ... هذه الضحه باهله وحرم واطفال ودم نحره وعضيده

دماء حسين رادت للضلم ينزال ... وابو سفيان ينحر شيعتك لازال

يكول الحك للاصحاب ... جرح لليوم ماطاب

يضل حبك عشكنه وبيرغك عالي

كصدو كبتك كل ضنهم يزول صرح نورك العالي ... حكهم ما درو بكلوبنه يلوح بنيانك يغالي

تضل انواركم مشعل للاحرار ونضل الكم نوالي ... ولو زرعو دروبك قتل واحقاد نجيك ولا نبالي

لان حبكم بدمنه وينفجر شلال ... وسعي اهل الكفر لا ما يغير الحال

نحبكم يبن الاطياب ... جرح لليوم ماطاب

يضل حبك عشكنه وبيرغك عالي

وتضل سامرا بيكم رافعه الهام وتتباهى بكرمكم ... وطيب ترابكم بيه مشفى للناس ماخاب السئلكم

وعلى اذان الفجر تتسابك الناس وتصلي بحرمكم ... واسراب الطيور تحوم وتدور وتغني باسمكم

يميزان العداله على الارض ميميل ... يحب يسري بدمانه وجيل يخلف جيل

نريد الكم يالاحباب ... جرح لليوم ماطاب

يضل حبك عشكنه وبيرغك عالي

يالقائم دعينه لكرب ملكاك وتعم العداله ... وردنه بكل عقيده نثور وياك يعنوان الاصاله

نوكف للضلم يالغايب وياك ونبدد محاله ... وتجاوب يا امامي بطلعة لواك مواليكم سؤاله

نبيع ركاب دونك يا عضيم الشان ... ونريد الحك يبن نور الامامه يبان

ندوس وياك الارهاب ... جرح لليوم ما طاب

يضل حبك عشكنه وبيرغك عالي

على وزن ( اشوفك كل فجر يحسين قرااني )رحيم الحسناوي