عصافير السلف صارلهن عشر تيام رايحين رادين والهوسة يگولن صوتهه بالبصرة لكن الردح ببغداد والوادم مطشرة شي بالاردن لابده وشي تدك وتلطم بلبنان، شنهو السالفة بعد اخوچن؟ گالو چا غير لزموا صباح البزوني رئيس مجلس المحافظة بالبصرة؟ گلتلهم هاي اعرفهه والدنيا هم تعرفهه بعد،وهاي بالبصرة چا شمالهم ببغداد يردحون ويا هو الليردح؟ بس لا سالفتكم تعبانة، لا وروح ابوك محفوظ موش تعبانه ابدا كال احد العصافير، كلت له زين فهمونه شالسالفة؟ كالوا البزوني جماعة الخضراء والجادرية چانو متفقين يجيبونه محافظ للبصرة، وقبل مدة اخذوه للجادرية ووقعوه على الاستمارة حتى يصير من داخل الشلة مال واحد اسمه قصي محبوبة، گلت الهم: ايه!! وهذا قصي كان مدستر الشغلة ويه واحد بالخضراء من مضيف شيخ العساچر بيهه اسمه نوفل ابو الشون! واتفقوا الجماعة ان يكون البزوني هو المحافظ حتى ياكلون خبيزة من البصرة،.
المهم يا محفوظ البزوني ماخذ ٤٥٠ الف دولار وهاي ال١٠٠ الف اللي طلعت بالورقة مال الجميح السعودي هاي احد وصولات التسليم، بس الصراحة هي لگيمة زغيرووووونه لان العراوي الچبيرة ظلت يم جماعة بغداد، وهسه الربع خايفين لا يجيب البزوني اسمهم بالطاري ولذلك ابن محبوبة ملخ للاردن وهناك گاعد يردح ، واذا اجه لبغداد يتسترون عليه جماعته بالجادرية وبالخضراء، والشريك اللبناني الثالث بالقضية حسن فران اللي هوه دستر القضية مع السعودي الجميح كاعد يدگ ويلطم، ويصيح طلعت من المولد بلا حمص!! عود شنو محفوظ طلع من المولد بلا حمص؟
ولكم هذا يعني طلع ماله نصيب يعني بلا بوش من هالعرس، كالت العصفورة الجماعة صاير عدهم هبطة كلش وهمه جاي يدسترون للانتخابات لان كلهم ينتظرون البزوني بس لا يذكر له اسم فلان وعلتان، گلت الهم لا تخافون على الكبار هسه يطلعون ويترسون اذانات الوادم بحچي النزاهة والقانو، ويقشمرون عليهم مثل ما قشمر ابو سريوه الوادم بهوسة القانون وطلعت الوادم من المولد بلا قانون
من صفحة سوالف البراني على الفيسبوك
ليش اعتقلوا رئيس مجلس محافظة البصرة صباح البزوني
