سولفلي واحد من ربعي ضابط بالجيش العراقي ايكول: اني جنت ضابط خفر الوحدة والقينا القبض على سيارتين اطوال مال نفط مهرب وحجزناهم بمقر اللواء, الغروب جرني احد الجنود وكال سيدي وحدة من السيارات الطوال مال النفط طلعت من المعسكر, حركنا قواتنا ورجعنّة السيارة وبعد التي والليتا عرفنة إن الشخص اللي هرب السيارة الطويلة مال النفط هو ضابط امن الوحدة وبامر من عميد ويانة من استخبارات الفرقة, ويكول صاحبي شو ما طلعت علية سيارة كلهة كامت اتخابر ويردونة انطلعهم امن الحجز, وكلهة ادافع عن ضابط الامن من الآمر الى اصغر ضابط في استخبارات الفرقة, وبعد ما تحققت من الموضوع عرفت فرقتنه بيهة عصابة مال حرامية هي اللي اتساعد على تهريب النفط, وانوب اني ابتليت على عمري ويريدون اينقلوني من الفرقة لأن كشفت الحرامية وانه هم مو اشوية هم لوتي كلتلهم اني مصور الكتب والمخاطبات الي رادو يهربون بيه السيارات الطوال وكلتلهم اذا اتحرشتو بيه اخبر عليكم الروس الكبار .
شكرت صاحبي على موقفة الوطني وكلتلة عمي دير بالك لا تخبر عليهم الروس الكبار, بالجيش العراقي هم روس الحرامية لان عراقنا الحبيب بيه شيء ما موجود عند غيرة بيه حاميه حراميه وما ندري منوا يدير بالة على النفطات .
منوا يدير بالة على النفطات ..... حبزبووووز
